1990-1993 aðeins af sjálfum mér, tengt tónlistaruppeldi

Á þessum árum(c.a. 1989-1993) er ég í malbikinu, eins og lög gera ráð fyrir. Þarna unnu menn sem voru mikið að grúska í tónlist. Ber þá fyrst að nefna Lárus gítarleikar og vin Þórhalls. Hann hlustaði á mjög skrítna tónlist en hafði líka eyra fyrir ýmsu öðru sem var ekki skrítið og var að nema klassískan gítarleik.

Nonni (Jón Örn) gítarleikar og aðalspraut Bootlegs manna, hann var eitthvað lítið að spila með þeim þetta sumarið og stofnuðum við því tríó, ég lék á trommur, Almar á bassa, og Nonni söng og spilaði á gítar. Við æfðum sem óðir væru. Nonni hafði gríðarlegt vald á rafgítar sínum og var aðdáunarvert að sjá hann syngja hástöfum og taka gítarsóló um leið.
Nonni kom með kasettu í vinnuna með Police, áhana var mikið hlustað í pásum og þegar þurfti að bíða eftir biki, eins og menn þekkja sem hafa komið nálægt þessum bransa þá gat hangsið verið oft ansi mikið.

Sama sumar var Davíð nokkur að vinna hjá karli föður mínum. Hann var dálítið skritinn náungi líka, en kom í ljós við nánari eftirgrenslan að hann var söngvari hljómsveitar er hét Rauðir fletir. Sú hljómsveit hafði náð hatindinum 1987 með laginu "Þögn af plötu". Davíð hafði háar hugmyndir um tónlist og hvernig átti að slá í gegn og var hann stöðugt í þeim pælingum.

Við, að sjálfsögðu, gengum á lagið og hófum æfingar með honum. Það var æft stíft(sama uppstilling sem fyrr, Almar, ég og svo Davíð), sömdum lög og pikkuðum upp. Svo kom að því að Davíð þurfti að fara erlendis , nánartiltekið til Kýpur að vinna á bílaleigu, en hafði viðkomu í London þar sem hann ætlaði að taka upp þessi lög(demo) sem við höfðum samið með honum. Hann ætlaði svo að snúa heim með meistaraverkin og heimurinn átti að liggja að fótum okkar. Náunginn sem hann vann fyrir í Kýpur ætlaði að gera hann að stjörnu, að hans sögn, og borgaði sá studioið og ferðir fyrir hann fram og til baka ofl.

Davíð fór út, kom til baka með þessa kasettu fulla af lögum. Á spólunni mátti heyra söng og hógværan rafgítarleik Davíðs, svo var bætt ofan á það með tölvu trommuslætti og bassalínum, allt samkvæmt nýjustu tækni. Við hófum að æfa aftur og ná því sem hann hafði sett á teip, en Davíð þurfti að fara út aftur og síðan hefur ekki meira til hans spurst. Spólan er til fyrir áhugasama.